Qazax jurnalist oğurlandı-FOTO - 24 December 2012

Qazax jurnalist, "Qanun və ədalət" Qazaxıstan KİV alyansı press-klubunun rəhbəri Tokberqen Abiev Astanada itkin düşüb.

Azeri-xeber.ucoz.com-un tengrinews.kz saytına istinadən xəbərinə görə, bu barədə Qazaxıstan Jurnalistlər İttifaqının sədri Seyitkazı Mataev bu gün keçirdiyi mətbuat konfransında bildirib: "Jurnalist Tokberqen Abiev itkin düşüb. O, "Qanun və ədalət" qəzetinə rəhbərlik edir. Dekabrın 20-də axşam jurnalist evdən çıxarkən həyat yoldaşına mətbuat konfransına hazırlaşmaq üçün ofisə getdiyini bildirib. Lakin o, itkin düşüb. Bundan əvvəl jurnalist həmkarlarına "Korrupsiyaya qurşanan şəxs həbs olunmalıdır" başlığı ilə məlumat göndərib və bildirib ki, dekabrın 21-də bu məsələ ilə bağlı mətbuat konfransı keçirəcək".

"Adil söz" beynəlxalq söz azadlığı müdafiə fondunun prezidenti Tamara Kalaeva isə Astana Daxili İşlər Departamentinin jurnalistin itkin düşməsi ilə bağlı araşdırma apardığını bildirib. Kalaeva Tokberqen Abiyevin itkin düşməsinin peşə fəaliyyəti ilə bağlı olduğunu da bildirib: "Əgər jurnalist səhər səs-küylü mətbuat konfransının keçiriləcəyini bildirir və axşam itkin düşürsə, burada başqa versiyaya yer yoxdur".