Əhalinin sıx məskunlaşdığı sənaye müəssisələrinin fəaliyyət göstərdiyi və nəqliyyat vasitələrinin çox olduğu şəhərlərdə ətraf mühitə tullantıların daha çox olduğu qeydə alınıb. Bu şəhərlər siyahısında birinci yeri paytaxt Bakı tutur. Ekologoya və Təbii Sərvətlər Nazirliyinin ətraf mühit üzrə milli monitorinq Departamentinin ölkə üzrə apardığı qiymətləndirməyə görə, siyahıda ikinci yerdə Sumqayıt, üçüncü isə Gəncə şəhəridir. 

Ekologoya və Təbii Sərvətlər Nazirliyinin Ətraf Mühit Üzrə Milli Monitorinq Departamentinin direktor müavini Mətanət Avazova deyir ki, Bakı üzrə ətraf mühitə atılan tullantıların 65-70%-i nəqliyyat vasitələrinin payına düşür. 

Əlbəttə, Bakının ölkənin ətraf mühitə tullantıların miqdarının daha çox təsir etdiyi şəhərlər siyahısında birinci olması gözlənilən nəticədir. Çünki, Bakıda nəqliyyat vasitələrinin ətraf mühitin çirklənməsinə təsiri artıq 2 dəfə artıb. 2000-ci ildə Bakıda 100 000 avtonəqliyyat növü vardısa, bu il qeyri-rəsmi hesablamara əsasən bu rəqəm 1 milyona çatıb. 2000-ci ildə ölkə, o cümlədən Bakı üzrə ətraf mühitə atılan tullantıların 70%-i sənayenin payına düşürdü, hazırda Bakıda zavod-fabriklərdən atılan tullantılar sanitar norma həddini keçmir və normanın ən aşağı hədlərində qeydə alınır.

Nəqliyyat vasitələrinin ətraf mühitə atdığı tullantıların azalması hiss olunmur. Mətanət Avazova isə bunun üçün hələ çox zaman lazım olduğunu deyir.