 Mali təhlükəsizlik qüvvələri Diabali şəhərində fransız əsgərlərinin islamçı qruplaşmalarla qarşıdurmaya girdiyini açıqlayıb. Xarici mediaya istinadən verilən məlumatına görə, "Əl-Qaidə" terror təşkilatı isə Fransanı təhdid edib.
Məlumata görə, Diabali bazar ertəsi üsyançıların nəzarətində olub. Ancaq Fransa hava qüvvələrinin müdaxiləsindən sonra şəhər üsyançılardan alınıb. Malidəki döyüşün altıncı günün isə prezident Fransua Oland bu müdaxilənin dəstəkləyən çıxış edib: "Müdaxilə etməsəydik, çox gec olardı".
Fransız rəsmiləri Malidəki qarşıdurmalara görə Almaniya və ABŞ-dan da dəstək aldıqlarını söyləyiblər.
Onların sözlərinə görə, İngiltərə bölgəyə iki nəqliyyat təyyarəsi göndərib. Son olaraq İtaliya da dəstək verməyə hazır olduğunu, amma quruda qarşıdurmaya girməyəcəyini açıqlayıb.
Artıq dünəndən 30 hərbi konvoy üsyançıların ələ keçirdiyi Diabali qəsəbəsinə doğru hərəkətə keçib. Fransız əsgərlərinə dəstək olmaq üçün Maliyə göndərilən ilk Afrika qüvələrinin isə ölkəyə sabah çatacağı gözlənilir.
Son məlumatlara görə, fransız döyüş təyyarələri qəsəbəyə havadan nəzarəti ələ keçirdikdən sonra üsyançıların mövqeləri dayanmadan bombalanır.
"Əl-Qaidə" ilə yanaşı, "Tövhid" və "Cihad" hərəkatı da Fransanı Maliyə girməsinə görə təhdid edib. İslamçı qruplaşmalar Fransanın bu addımın əvəzinin ağır olacağını bildiriblər. | 
