Meksikada bir gün ərzində merin ailəsi və polis rəisi daxil olmaqla 30 nəfərədək insan qətlə yetirilib. APA-nın "RİA Novosti”yə istinadən verdiyi xəbərə görə, 16 nəfərin qətli ABŞ-la həmsərhəd Çiuaua ştatında qeydə alınıb. Zorakılıq qurbanlarından 6 nəfəri Balyes şəhərin merinin qohumlarıdır, canilər onları işgəncə verdikdən sonra şəhər kənarında vəhşicəsinə öldürüblər.

Ölkənin Morelos ştatında isə quldurlar Amakusak şəhərinin polis rəisini cangüdəni ilə birlikdə güllələyiblər. Məlumata görə, aldıqları ağır yaralardan onlar bir müddət sonra xəstəxanada keçiniblər. Qeyd edək ki, polis rəisi bu vəzifəyə cəmi 4 gün əvvəl təyinatını alıb.  

Ötən gün daha bir qanlı hadisə ölkənin Torreon şəhərində baş verib. Naməlum silahlı şəxslər bara daxil olaraq 2 nəfəri qətlə yetiriblər. Qeyd edək ki, Torreon şəhərinin müxtəlif barlarında təkcə bu ilin yanvarında 5 nəfər öldürülüb, 6 nəfər isə yaralanıb.

Yerli ekspertlər qeyd edirlər ki, ölkədə hakimiyyətin dəyişilməsi və 2006-cı ildə narkomafiyaya müharibə elan etmiş Felipe Kalderonun prezident postundan getməsi hələ ki bölgələrdə zorakılıq səviyyəsini aşağı salmayıb.   

Xatırladaq ki, Meksikanın yeni prezidenti Enrike Penya Nyeto seçkiqabağı platformasında cinayətkarlığa qarşı mübarizə taktikasını dəyişəcəyinə və ölkədə cinayətkarlığın səviyyəsinin azaldacağına söz vermişdi.