Maya Pancikidze Litva səfəri zamanı Dağlıq Qarabağ münaqişəsi ilə bağlı sualı cavablandırarkən "münaqişəni yalnız Azərbaycanın ərazi bütövlüyü çərçivəsində həll etmək lazımdır” ifadəsini işlədib. Bu isə Gürcüstanın baş naziri Bidzina İvanişvilinin İrəvana səfər öncəsinə təsadüf etdiyindən Ermənistan mətbuatında anti-Gürcüstan ritorikasının alovlanmasına səbəb olub. 

Maraqlıdır ki, Pancikidzenin Qarabağla bağlı açıqlaması Saakaşvilinin rəhbərlik etdiyi Vahid Milli Hərəkət partiyasında da narazılıqla qarşılanıb. Partiyanın parlamentdəki nümayəndəsi Akaki Minaşvili xarici işlər nazirinin istefasını tələb edib. Deputatın fikrincə, İvanişvilinin yanvarın 17-də İrəvana nəzərdə tutulan səfəri öncəsi verilən bəyanat Gürcüstanı çətin vəziyyətə salıb. "Pancikidze səriştəsizdir, onun fəaliyyəti ölkəni mürəkkəb duruma salır. Onun Litvadakı bəyanatı baş nazir İvanişvilinin İrəvana səfərini sual altına qoyub. Biz həmçinin İvanişvilinin Bakıya səfəri öncəsi səslənən düşünülməmiş bəyanatları da yaxşı xatırlayırıq”, - deyə o vurğulayıb. 

Gürcü mətbuatının iddiasına inansaq, İvanişvili Pancikidzenin yerinə İrakli Menaqarişvilini təyin etməyə hazırlaşır. Menaqarişvili Eduard Şevardnadze dönəmlərində ölkənin xarici siyasət idarəsinin rəhbəri olub.